0:00
/
1ܘܟܲܕ ܬܘܼܡܸܡܠܹܗ ܟܠܵܝܗܝ ܗܹܡܸܙܡܵܢܹ̈ܐ ܠܡܲܫܡܵܥܝܬܹܗ ܕܛܵܝܸܦܵܐ: ܥܒܸܪܹܗ ܠܟܦܲܪܢܵܚܘܿܡ. 2ܘܪܹܓܵܐ ܕܚܲܕَ ܩܸܢܛܪܘܿܢܵܐ ܡܸܪܥܝܵܐ ܗ݇ܘܵܐ: ܐܲܝܢܝܼ ܕܐܝܼܬ ܗ݇ܘܵܐ ܠܹܗ ܚܵܬܸܪ ܠܟܸܣܠܹܗ: ܘܗܕܝܼܪܵܐ ܗ݇ܘܵܐ ܠܸܡܝܵܬܵܐ. 3ܘܫܡܸܥܠܹܗ ܒܘܼܬ ܕܝܼܫܘܿܥ: ܘܫܘܼܕܸܪܹܗ ܠܟܸܣܠܹܗ ܚܘܵܪ̈ܕܸܩܢܹܐ ܕܝܗَܘܼܕܵܝܹ̈ܐ: ܘܒܵܥܝܹܐ ܗ݇ܘܵܐ ܡܸܢܹܗ ܕܐܵܬܹܐ ܡܲܚܹܐ ܠܪܹܓܹܗ. 4ܘܐܵܢܝܼ ܟܲܕ ܐ݇ܬܹܐܠܗܘܿܢ ܠܟܸܣ ܝܼܫܘܿܥ ܦܘܼܪܦܸܠܗܘܿܢ ܒܝܹܗ ܒܚܵܒܵܛܘܼܬܵܐ ܘܐܵܡܪܝܼ: ܟܹܐ ܚܵܫܸܚ ܕܥܵܒ̣ܕܸܬ ܠܹܗ ܐܵܗܵܐ. 5ܣܵܒܵܒ ܕܟܹܐ ܡܲܚܸܒ̣ ܠܛܵܝܸܦܲܢ: ܘܐܘܼܦ ܟܢܘܼܫܬܵܐ ܒܢܹܠܹܗ ܩܵܬܲܢ. 6ܘܝܼܫܘܿܥ ܐَܙܸܠܹܗ ܥܲܡܵܝܗܝ. ܐܝܼܢܵܐ ܟܲܕ ܠܹܐ ܗ݇ܘܵܐ ܪܵܒܵܐ ܪܸܚܩܵܐ ܡ̣ܢ ܒܲܝܬܵܐ: ܫܘܼܕܸܪܹܗ ܠܟܸܣܠܹܗ ܩܸܢܛܪܘܿܢܵܐ ܕܵܘܣܬܘܼ̈ܗܝ: ܘܐَܡܝܼܪܹܗ ܐܸܠܹܗ: ܡܵܪܝܼ: ܙܲܗܡܲܬ ܠܵܐ ܓܵܪܫܸܬ: ܣܵܒܵܒ ܕܠܹܐ ܚܵܫܚܸܢ ܕܥܵܒܼܪܸܬ ܬܚܘܿܬ ܫܟܘܼܪܝܼ. 7ܣܵܒܵܒ ܕܐܵܗܵܐ ܐܵܢܵܐ ܠܵܐ ܚܫܸܚܠܝܼ ܕܠܟܸܣܠܘܼܟܼ ܐܵܬܸܢ ܗ݇ܘܵܐ: ܐܸܠܵܐ ܐَܡܘܿܪ ܒܗܹܡܸܙܡܵܢ: ܘܒܸܬ ܒܵܣܸܡ ܝܵܠܕَܝܼ. 8ܣܵܒܵܒ ܐܘܼܦ ܐܵܢܵܐ ܐ݇ܢܵܫܵܐ ܝܘܸܢ ܡܘܼܬܒ̣ܵܐ ܬܚܘܿܬ ܗܘܼܟܡܵܐ: ܘܐܝܼܬ ܬܚܘܿܬ ܐܝܼܕܝܼ ܣܲܪ̈ܒܵܙܹܐ: ܘܟܹܐ ܐܵܡܪܸܢ ܠܐܵܗܵܐ: ܙܹܠَܐ: ܘܟܹܐ ܐܵܙܸܠ: ܘܠܗ̇ܘ ܐ݇ܚܹܪ݇ܢܵܐ: ܬܵܐ: ܘܟܹܐ ܐܵܬܹܐ: ܘܠܪܹܓܝܼ: ܥܒ̣ܘܿܕ ܐܵܗܵܐ: ܘܟܹܐ ܥܵܒܸܕ. 9ܟܲܕ ܫܡܸܥܠܹܗ ܝܼܫܘܿܥ ܐܲܢܹܐ: ܥܘܼܓ̰ܸܒܠܹܗ ܒܝܹܗ: ܘܕܸܪܹܗ ܘܐَܡܝܼܪܹܗ ܠܟܸܢܫܵܐ ܕܒܹܐܬܵܝܵܐ ܗ݇ܘܵܐ ܒܵܬَܪܹܗ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܐܘܼܦ ܓܵܘ ܝܼܣܪܵܝܹܠ ܠܵܐ ܡܘܼܫَܟ̰ܸܚܠܝܼ ܐܲܝܟܼ ܕܐܵܗܵܐ ܗܲܝܡܵܢܘܼܬܵܐ. 10ܘܐܵܢܝܼ ܕܦܸܫܠܗَܘܿܢ ܫܘܼܕܸܪܹܗ ܕܸܪܘܿܢ ܠܒܲܝܬܵܐ: ܘܡܘܼܫَܟ̰ܸܚܠܗܘܿܢ ܠܗ̇ܘ ܪܹܓܵܐ ܕܝܼܗ݇ܘܵܐ ܡܸܪܥܵܝܵܐ ܒܣܝܼܡܵܐ. 11ܘܗَܘܹܐ ܠܵܗ̇ ܒܝܵܘܡܵܢܹ̈ܐ ܕܒܵܬَܪܹܗ: ܒܹܐܙܵܠܵܐ ܗ݇ܘܵܐ ܠܡܕܝܼܢَܬܵܐ ܕܫܸܡܘܼܗ̇ ܢܵܐܹܝܢ: ܘܬܲܠܡܝܼܕܘܼ̈ܗܝ ܐَܙܸܠܗܘܿܢ ܥܲܡܹܗ: ܘܟܸܢܫܵܐ ܪܵܒܵܐ. 12ܘܟܲܕ ܩܘܼܪܒܸܢܹܗ ܠܬܲܪܥܵܐ ܕܡܕܝܼܢَܬܵܐ: ܗܵܐ: ܦܵܠܘܿܛܹܐ ܗ݇ܘܵܘ ܚܲܕَ ܡܝܼܬܵܐ: ܕܒܪܘܿܢܵܐ ܝܲܟܵܢܵܐ ܗ݇ܘܵܐ ܠܝܸܡܹܗ: ܘܗ̇ܝ ܝܸܡܹܗ ܐܲܪܡܸܠܬܵܐ ܗ݇ܘܵܐ: ܘܟܸܢܫܵܐ ܪܵܒܵܐ ܕܒܢܲܝ̈ ܡܕܝܼܢَܬܵܐ ܥܲܡܵܗ̇. 13ܘܟܲܕ ܚܸܙܝܵܠܹܗ ܡܵܪܲܢ: ܪܘܼܚܸܡܠܹܗ ܥܲܠܘܼܗ̇: ܘܐَܡܝܼܪܹܗ ܐܸܠܵܗ̇: ܠܵܐ ܒܲܟ̣ܝܲܬܝ. 14ܘܐَܙܸܠܹܗ ܕܩܸܪܹܐ ܒܥܵܪَܣܵܐ: ܘܐܵܢܝܼ ܕܫܩܝܼܠܘܼܗ̇ ܗ݇ܘܵܘ ܟܠܹܠܗܘܿܢ: ܘܐܵܡܸܪ: ܓ̰ܘܲܢܩܵܐ: ܐܸܠܘܼܟܼ ܒܹܐܡܵܪܵܐ ܝܘܸܢ: ܩܘܼܡَ. 15ܘܝܬܸܒ̣ܠܹܗ ܗ̇ܘ ܡܝܼܬܵܐ: ܘܫܘܼܪܹܐܠܹܗ ܠܗܲܡܙܘܼܡܹܐ. ܘܝܘܼܗَܒܼܸܠܹܗ ܠܝܸܡܹܗ. 16ܘܕܒܸܩܠܵܗ̇ ܙܕܘܿܥܬܵܐ ܠܟܠܵܝܗܝ ܐ݇ܢܵܫܹ̈ܐ: ܘܫܵܒܚܝܼ ܗ݇ܘܵܘ ܠܐܲܠܵܗܵܐ: ܘܐܵܡܪܝܼ: ܢܒ̣ܝܼܵܐ ܓܘܼܪܵܐ ܩܸܡܠܹܗ ܓܵܘܲܢ: ܘܣܘܼܚܒܸܪܹܗ ܐܲܠܵܗܵܐ ܠܛܵܝܸܦܹܗ. 17ܘܦܠܸܛܠܵܗ̇ ܒܘܼܬ ܕܝܹܗ ܐܵܗܵܐ ܗܹܡܸܙܡܵܢ ܒܟܠܵܗ̇ ܝܼܗܘܼܕ: ܘܒܟܠܹܗ ܐܲܬܪܵܐ ܕܚܵܕܸܪ̈ܘܵܢܵܝܗܝ. 18ܘܗܘܩܹܠܗܘܿܢ ܠܝܘܿܚܲܢܵܢ ܬܲܠܡܝܼܕܘܼ̈ܗܝ ܐܲܢܹܐ ܟܠܵܝܗܝ. 19ܘܩܪܹܐܠܹܗ ܝܘܿܚܲܢܵܢ ܠܬܪܹܝ ܡ̣ܢ ܬܲܠܡܝܼܕܘܼ̈ܗܝ: ܘܫܘܼܕܪܵܝܠܹܗ ܠܟܸܣ ܝܼܫܘܿܥ: ܘܐَܡܝܼܪܹܗ: ܐܲܢَܬ ܝܘܸܬ ܗ̇ܘ ܕܐܵܬܹܐ: ܝܲܢ ܠܚܲܕَ ܐ݇ܚܹܪ݇ܢܵܐ ܣܵܦܪܵܚ. 20ܘܐ݇ܬܹܐܠܗܘܿܢ ܐܵܢܝܼ ܐ݇ܢܵܫܹ̈ܐ ܠܟܸܣܠܹܗ ܘܐܵܡܪܝܼ ܐܸܠܹܗ: ܝܘܿܚܲܢܵܢ ܡܲܥܡܕܵܢܵܐ ܩܲܡ ܫܵܕܸܪܲܢ ܠܟܸܣܠܘܼܟܼ: ܒܹܐܡܵܪܵܐ: ܐܲܢَܬ ܝܘܸܬ ܗ̇ܘ ܕܐܵܬܹܐ: ܝܲܢ ܠܚܲܕَ ܐ݇ܚܹܪ݇ܢܵܐ ܣܵܦܪܵܚ. 21ܘܒܗ̇ܝ ܣܵܥܲܬ ܪܵܒܵܐ ܡ̣ܢ ܡܲܪ̈ܥܹܐ ܒܘܼܣܸܡܠܹܗ: ܘܡ̣ܢ ܡܲܚܘܵܬܹ̈ܐ ܘܡ̣ܢ ܪ̈ܘܼܚܹܐ ܒܝܼܫܵܬܹ̈ܐ: ܘܠܪܵܒܵܐ ܣܸܡܝܹ̈ܐ ܝܘܼܗَܒܼܸܠܹܗ ܠܸܚܙܵܝܵܐ. 22ܘܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܙܹܠَܡܘܿܢ ܐَܡܘܿܪܘܼܢ ܠܝܘܿܚܲܢܵܢ ܡܸܢܕܝܼ ܕܚܙܹܠܵܘܟ̣ܘܿܢ ܘܫܡܸܥܠܵܘܟ̣ܘܿܢ: ܣܸܡܝܹ̈ܐ ܒܸܚܙܵܝܵܐ ܝܢܵܐ: ܫܸܠܹ̈ܐ ܒܸܚܕܵܪܵܐ ܝܢܵܐ: ܓܸܪ̈ܒ̣ܵܢܹܐ ܦܝܵܫܵܐ ܝܢܵܐ ܕܘܼܟ̣ܝܹܐ: ܘܟܲܪܹ̈ܐ ܒܸܫܡܲܥܝܵܐ ܝܢܵܐ: ܡܝܼܬܹ̈ܐ ܒܸܩܝܵܡܵܐ ܝܢܵܐ: ܘܡܸܣܟܹܢܹ̈ܐ ܦܝܵܫܵܐ ܝܢܵܐ ܡܘܼܫܚܸܕܹܐ. 23ܘܛܘܼܒ̣ܵܐ ܠܡ̇ܢ ܕܠܵܐ ܦܵܐܸܫ ܡܘܼܟܦܸܪܵܐ ܒܝܼܝܼ. 24ܐܝܼܢܵܐ ܟܲܕ ܐَܙܸܠܗܘܿܢ ܩܵܨܸܕܹ̈ܐ ܕܝܘܿܚܲܢܵܢ: ܫܘܼܪܹܐܠܹܗ ܠܹܐܡܵܪܵܐ ܠܟܸܢܫܹ̈ܐ ܒܘܼܬ ܕܝܘܿܚܲܢܵܢ: ܡܘܼܕܝܼ ܦܠܸܛܠܵܘܟ̣ܘܿܢ ܠܒܲܪܝܼܵܐ ܠܸܚܙܵܝܵܐ: ܙܹܠܵܐ ܡ̣ܢ ܦܵܘܚܵܐ ܫܥܝܼܫܵܐ. 25ܐܸܢ ܠܵܐ: ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܐ݇ܢܵܫܵܐ ܕܓ̰ܘܼ̈ܠܹܐ ܪ̈ܵܟܝܼܟܹܐ ܠܒ̣ܝܼܫܵܐ: ܗܵܐ: ܐܵܢܝܼ ܕܒܠܒܸܫܝܵܬܹ̈ܐ ܚܩܝܼܪܹ̈ܐ ܘܒܒܘܼܣܵܡܹ̈ܐ ܝܢܵܐ: ܓܵܘ ܒܵܬܹ̈ܐ ܕܡܲܠܟܹ̈ܐ ܝܢܵܐ. 26ܐܸܢ ܠܵܐ: ܡܘܼܕܝܼ ܦܠܸܛܠܵܘܟ̣ܘܿܢ ܠܸܚܙܵܝܵܐ: ܢܒ̣ܝܼܵܐ: ܗܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܘܙܵܘܕܵܐ ܡ̣ܢ ܢܒ̣ܝܼܵܐ. 27ܐܵܗܵܐ ܝܠܹܗ ܕܒܵܗَܣܹܗ ܟܬܝܼܒ̣ܵܐ ܝܠܹܗ: ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܩܵܨܸܕܝܼ ܩܵܕَܡ ܦܵܬܘܼܟ: ܕܗܵܕܸܪ ܐܘܼܪܚܘܼܟ ܩܵܕَܡܘܼܟ. 28ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܠܲܝܬ ܢܒ̣ܝܼܵܐ ܓܵܘ ܗَܘ̈ܝܹܐ ܡ̣ܢ ܒܲܟ̣ܬܵܬܹ̈ܐ ܕܒܘܼܫ ܓܘܼܪܵܐ ܡ̣ܢ ܝܘܿܚܲܢܵܢ: ܐܝܼܢܵܐ ܙܥܘܿܪܵܐ ܒܡܲܠܟܘܼܬܵܐ ܕܐܲܠܵܗܵܐ ܒܘܼܫ ܓܘܼܪܵܐ ܝܠܹܗ ܡܸܢܹܗ. 29ܘܟܠܹܗ ܛܵܝܸܦܵܐ ܕܫܡܸܥܠܗَܘܿܢ: ܐܘܼܦ ܕܲܡܓ̣ܵܟ̰̈ܝܹܐ: ܡܘܼܟܫܸܛܠܗܘܿܢ ܠܐܲܠܵܗܵܐ: ܕܥܡܝܼܕܹܐ ܗ݇ܘܵܘ ܡܲܥܡܘܿܕܝܼܬܹܗ ܕܝܘܿܚܲܢܵܢ. 30ܐܝܼܢܵܐ ܦܪ̈ܝܼܫܹܐ ܘܫܲܪܥܲܬܟܵܪܹ̈ܐ ܡܘܼܣܠܹܠܗܘܿܢ ܒܓܵܢܵܝܗܝ ܪܸܙܵܝܵܐ ܕܐܲܠܵܗܵܐ: ܟܲܕ ܠܵܐ ܦܸܫܠܗَܘܿܢ ܥܡܝܼܕܹܐ ܡܸܢܹܗ. 31ܘܐَܡܝܼܪܹܗ ܡܵܪܲܢ: ܠܡ̇ܢ ܗܲܕܟ̣ܵܐ ܡܲܕܡܸܢ ܐ݇ܢܵܫܹ̈ܐ ܕܐܵܗܵܐ ܐܘܼܓ̰ܵܓ̣: ܘܠܡ̇ܢ ܟܹܐ ܕܵܡܝܼ. 32ܟܹܐ ܕܵܡܝܼ ܠܝܵܠܹܕَܐ ܕܝܵܬܒ̣ܝܼ ܒܫܘܼܩܵܐ ܘܡܲܩܘܸܚܝܼ ܚܲܕَ ܠܗ̇ܘ ܐ݇ܚܹܪ݇ܢܵܐ ܘܐܵܡܪܝܼ: ܡܚܹܐܠܲܢ ܙܘܼܪܢܵܐ ܐܸܠܵܘܟ̣ܘܿܢ ܘܠܵܐ ܪܩܸܕܠܵܘܟ̣ܘܿܢ: ܘܝܠܹܠܲܢ ܐܸܠܵܘܟ̣ܘܿܢ: ܘܠܵܐ ܒܟܹܠܵܘܟ̣ܘܿܢ. 33ܣܵܒܵܒ ܕܐَܬܹܐܠܹܗ ܝܘܿܚܲܢܵܢ ܡܲܥܡܕܵܢܵܐ: ܠܵܐ ܒܹܐܟ̣ܵܠܵܐ ܠܲܚܡܵܐ ܘܠܵܐ ܒܸܫܬܵܝܵܐ ܚܲܡܪܵܐ: ܘܒܹܐܡܵܪܵܐ ܝܬܘܿܢ: ܕܲܝܘܵܐ ܐܝܼܬ ܒܝܹܗ. 34ܐَܬܹܐܠܹܗ ܒܪܘܿܢܹܗ ܕܐ݇ܢܵܫܵܐ ܒܹܐܟ̣ܵܠܵܐ ܘܒܸܫܬܵܝܵܐ: ܘܒܹܐܡܵܪܵܐ ܝܬܘܿܢ: ܗܵܐ: ܐ݇ܢܵܫܵܐ ܐܵܟ̣ܘܿܠܵܐ ܘܫܵܬܝܵܢܵܐ ܕܚܲܡܪܵܐ: ܘܕܵܘܣܬ ܕܕܲܡܓ̣ܵܟ̰̈ܝܹܐ ܘܚܲܛܵܝܹ̈ܐ. 35ܘܦܸܫܠܵܗ̇ ܡܘܼܟܫܸܛܬܵܐ ܥܵܩܸܠܕܵܪܘܼܬܵܐ ܡ̣ܢ ܟܠܵܝܗܝ ܒܢܘܿܢܘܼ̈ܗ̇. 36ܐܝܼܢܵܐ ܒܸܥܠܹܗ ܡܸܢܹܗ ܚܲܕَ ܡ̣ܢ ܦܪ̈ܝܼܫܹܐ ܕܐܵܟܼܸܠ ܥܲܡܹܗ. 37ܘܥܒܸܪܹܗ ܠܒܲܝܬܹܗ ܕܗ̇ܘ ܦܪܝܼܫܵܐ: ܘܝܬܸܒ̣ܠܹܗ ܠܨܘܼܦܪܵܐ. ܘܗܵܐ: ܒܲܟ̣ܬܵܐ ܒܗ̇ܝ ܡܕܝܼܢَܬܵܐ: ܕܝܼܗ݇ܘܵܐ ܚܲܛܵܝܬܵܐ: ܘܟܲܕ ܝܕܸܥܠܵܗ̇ ܕܝܬܝܼܒ̣ܵܐ ܗ݇ܘܵܐ ܠܨܘܼܦܪܵܐ ܓܵܘ ܒܲܝܬܹܗ ܕܦܪܝܼܫܵܐ: ܫܩܸܠܵܗ̇ ܫܵܛܝܼܦܬܵܐ ܕܒܸܣܡܵܐ. 38ܘܟܠܹܠܵܗ̇ ܒܵܬَܪܹܗ ܠܟܸܣ ܐܲܩܠܘܼ̈ܗܝ: ܘܒܵܟ̣ܝܵܐ ܗ݇ܘܵܐ: ܘܫܘܼܪܹܠܵܗ̇ ܒܕܸܡܥܘܼ̈ܗ̇ ܠܡܲܬܪܘܼܝܹܐ ܐܲܩܠܘܼ̈ܗܝ: ܘܒܟܵܘܣܵܐ ܕܪܹܫܵܗ̇ ܡܵܫܝܵܗ̇ ܗ݇ܘܵܐ ܠܗ݇ܘܿܢ: ܘܢܵܫܩܵܗ̇ ܗ݇ܘܵܐ ܐܲܩܠܘܼ̈ܗܝ: ܘܡܵܫܚܵܐ ܗ݇ܘܵܐ ܠܗ݇ܘܿܢ ܒܒܸܣܡܵܐ. 39ܐܝܼܢܵܐ ܟܲܕ ܚܙܹܐܠܹܗ ܗ̇ܘ ܦܪܝܼܫܵܐ ܕܩܪܹܐܠܹܗ: ܚܫܸܒ̣ܠܹܗ ܒܓܵܢܹܗ ܘܐَܡܝܼܪܹܗ: ܐܸܢ ܐܵܗܵܐ ܗܵܘܹܐ ܗ݇ܘܵܐ ܢܒ̣ܝܼܵܐ: ܒܸܬ ܝܵܕܸܥ ܗ݇ܘܵܐ ܡܵܢܝܼ ܝ݇ܠܵܗ̇ ܘܡܘܼܕܝܼ ܬܵܗܵܪ ܒܲܟ̣ܬܵܐ ܝ݇ܠܵܗ̇: ܕܚܲܛܵܝܬܵܐ ܝ݇ܠܵܗ̇ ܒܲܟ̣ܬܵܐ ܗ̇ܝ ܕܕܩܸܪܵܗ̇ ܒܝܹܗ. 40ܘܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܹܗ: ܫܸܡܥܘܿܢ: ܡܸܢܕܝܼ ܐܝܼܬ ܠܝܼ ܕܐܵܡܪܸܢܘܼܟ: ܘܐَܡܝܼܪܹܗ ܐܸܠܹܗ: ܐَܡܘܿܪ: ܪܵܒܝܼ. 41ܚܲܕَ ܡܵܪܵܐ ܕܕܵܝܢܵܐ ܐܝܼܬ ܗ݇ܘܵܘ ܠܹܗ ܬܪܹܝ ܕܵܝܢܵܢܹ̈ܐ: ܚܲܕَ ܕܵܝܢܵܢܵܐ ܗ݇ܘܵܐ ܐܸܠܹܗ ܚܲܡܸܫܡܵܐܐ ܕܝܼܢܵܪܹ̈ܐ: ܘܗ̇ܘ ܐ݇ܚܹܪ݇ܢܵܐ ܚܲܡܫܝܼ ܕܝܼܢܵܪܹ̈ܐ. 42ܘܕܠܲܝܬ ܗ݇ܘܵܐ ܠܗ݇ܘܿܢ ܠܸܦܪܲܥܝܵܐ: ܠܬܸܪ̈ܘܵܝܗܝ ܦܘܼܚܸܠܹܗ. ܐܲܝܢܝܼ ܡܸܢܵܝܗܝ ܗܲܕܟ̣ܵܐ ܙܵܘܕܵܐ ܒܸܬ ܡܲܚܸܒ ܠܹܗ. 43ܓ̰ܘܼܘܸܒܠܹܗ ܫܸܡܥܘܿܢ ܘܐَܡܝܼܪܹܗ: ܒܸܚܫܵܒ̣ܵܐ ܝܘܸܢ ܗ̇ܘ ܕܦܸܫܠܹܗ ܫܒ̣ܝܼܩܵܐ ܐܸܠܹܗ ܙܵܘܕܵܐ: ܘܗ̇ܘ ܐَܡܝܼܪܹܗ ܐܸܠܹܗ: ܒܬܪܘܼܨܘܼܬܵܐ ܕܸܢܘܼܟ. 44ܘܕܸܪܹܗ ܠܟܸܣ ܒܲܟ̣ܬܵܐ: ܘܐَܡܝܼܪܹܗ ܠܫܸܡܥܘܿܢ ܒܸܚܙܵܝܵܐ ܝܘܸܬ ܐܵܗܵܐ ܒܲܟ̣ܬܵܐ: ܠܒܲܝܬܘܼܟ ܥܒܸܪܝܼ؛ ܡ̈ܝܼܵܐ ܠܐܲܩܠܵܬܝܼ̈ ܠܵܐ ܝܘܼܗَܒܼܸܠܘܼܟܼ: ܐܝܼܢܵܐ ܐܵܗܵܐ ܒܕܸܡܥܘܼ̈ܗ̇ ܐܲܩܠܝܼ̈ ܡܘܼܬܪܹܠܵܗ̇: ܘܒܟܵܘܣܘܼܗ̇ ܡܸܫܚܵܠܵܗ̇. 45ܐܲܢَܬ ܠܵܐ ܢܫܝܼܩܸܢܘܼܟ: ܐܝܼܢܵܐ ܐܵܗܵܐ: ܡ̣ܢ ܕܥܒܸܪܝܼ؛ ܠܵܐ ܫܠܹܠܵܗ̇ ܡ̣ܢ ܠܸܢܫܵܩܵܐ ܐܲܩܠܝܼ̈. 46ܐܲܢَܬ ܡܸܫܚܵܐ ܠܪܹܫܝܼ ܠܵܐ ܡܫܸܚܠܘܼܟܼ: ܐܝܼܢܵܐ ܐܵܗܵܐ ܒܡܸܫܚܵܐ ܕܒܸܣܡܵܐ ܠܐܲܩܠܝܼ̈ ܡܫܸܚܠܵܗ̇. 47ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܘܼܟܼ: ܕܫܒ̣ܝܼܩܹܐ ܝܢܵܐ ܐܸܠܵܗ̇ ܚܛܝܼܵܬܘܼ̈ܗ̇ ܪܵܒܵܐ: ܣܵܒܵܒ ܕܡܘܼܚܸܒܠܵܗ̇ ܪܵܒܵܐ. ܐܝܼܢܵܐ ܗ̇ܘ ܕܚܲܕَܟ̰ܵܐ ܦܵܐܹܫ ܫܒ̣ܝܼܩܵܐ ܐܸܠܹܗ: ܚܲܕَܟ̰ܵܐ ܟܹܐ ܡܲܚܸܒ. 48ܘܐَܡܝܼܪܹܗ ܐܸܠܵܗ̇: ܫܒ̣ܝܼܩܹܐ ܝܢܵܐ ܐܸܠܵܟ̣ܝ ܚܛܝܼܵܬܵܟ̣ܝ̈. 49ܐܝܼܢܵܐ ܫܘܼܪܹܠܗܘܿܢ ܐܵܢܝܼ ܕܝܼܗ݇ܘܵܘ ܝܬܝܼܒܹܐ ܠܨܘܼܦܪܵܐ ܥܲܡܹܗ ܠܹܐܡܵܪܵܐ ܒܓܵܢܵܝܗܝ: ܡܵܢܝܼ ܝܠܹܗ ܐܵܗܵܐ ܕܐܘܼܦ ܚܛܝܼܵܬܹ̈ܐ ܒܸܫܒ̣ܵܩܵܐ ܝܠܹܗ. 50ܘܐَܡܝܼܪܹܗ ܠܒܲܟ̣ܬܵܐ: ܗܲܝܡܵܢܘܼܬܵܟ̣ܝ ܩܲܡ ܡܲܚܝܼܵܐ ܠܵܟ̣ܝ: ܙܹܠَܝ ܒܫܠܵܡܵܐ.